Karya : Khoiriyyah Azzahro
Baisukan ulun taungut
Mahadapi sungai nang masih bapagut
Wan ambun subuh nang bakabut
Kaingatan matan halus
Mandi di sungai bakunyung tarus
Kecipak kecipuk awak jimus
Baisukan masih taungut
Mahadangi jukung nang balarut
Mambawa awak gasan ilmu nang dituntut
Tapi damini ulun taungut
Mahadapi sungai nang basurut
Tatinggal ilung nang tasangkut
Kaganangan generasi penerus
Adakah inya kawa maurus
Sungai banua nang barigat tarus
Baisukan ulun taungut
Mahadapi sungai nang bahijua lumut
Wan bakipit rasa bakarut
Hayu! Kakawanan wan dingsanak
Kita maandak tangan wan fikir otak
Gasan sungai banua nang diwariskan ka cucu anak
Hayu! Samua jangan taungut
Kita barasihi sungai banua nang mulai baingsut
Supaya Banjar rami diélangi urang bajurut
Kuin, 2009
Puisi ini telah dimuat pada Harian Radar Banjarmasin 16 Oktober 2011
Tidak ada komentar:
Posting Komentar