Nasalis Si Maskot Banjar

Nasalis, Si Maskot Banjar

          Karya : Khoiriyyah Azzahro

Nasalis, Si Bekantan Manis

Manangis sorangan

Kadada lagi kawan

Gasan Nasalis

Umay, Nasalis...

Nang lucu banar

Kanapa manangis

Si Maskot Banjar

Nasalis, Si Bekantan Manis

Hamuk kada karuan

Kadada lagi hutan

Gasan Nasalis

Umay, Nasalis..

Si Maskot Banjar

Kanapa manangis

Wan hamuk banar

Maafkan manusia, Nasalis!

Puhun ditabang

Hutan dibabat

Nasalis hilang

Tatinggal sabat

Ampuni manusia, Nasalis!

Bakantan hilang

Habis barondot

Tasisa kandang

Di Taman Maskot

Kuin, 2009   

Sungai Taungut

Sungai Taungut

  Karya : Khoiriyyah Azzahro

Baisukan ulun taungut

Mahadapi sungai nang masih bapagut

Wan ambun subuh nang bakabut

Kaingatan matan halus

Mandi di sungai bakunyung tarus

Kecipak kecipuk awak jimus

Baisukan masih taungut

Mahadangi jukung nang balarut

Mambawa awak gasan ilmu nang dituntut

Tapi damini ulun taungut

Mahadapi sungai nang basurut

Tatinggal ilung nang tasangkut

Kaganangan generasi penerus

Adakah inya kawa maurus

Sungai banua nang barigat tarus

Baisukan ulun taungut

Mahadapi sungai nang bahijua lumut

Wan bakipit rasa bakarut

Hayu! Kakawanan wan dingsanak

Kita maandak tangan wan fikir otak

Gasan sungai banua nang diwariskan ka cucu anak

Hayu! Samua jangan taungut

Kita barasihi sungai banua nang mulai baingsut

Supaya Banjar rami diélangi urang bajurut

Kuin, 2009

Puisi ini telah dimuat pada Harian Radar Banjarmasin 16 Oktober 2011